Pahibaro:
Ini ngatanan durot han akon riko ngan matinohaon nga panlantaw. Ini ngatanan amo in usa nga istorya nga natatabo pa hapagkayana…kun diin, kun kanay, kun kakan-o…adi an akon istorya.Pasalamat:
Syahan, para han akon abtik ngan baltok nga taga-esplikar ha akon kun baga naglalambod nga dila hini nga pagtagaistorya nga winaray…kan Prokopyo…Mano saludo ak ha im’! Amo ini hiya an inspirasyon han ak pagsurat utro hin Winaray.Ikaduha, kan Culver, bana tak hinigugma nga sangkay nga hi Sarah nga amo an naghatag hin kawurok ngan usa kagab-i nga di pangaturog, dara han iya pagpirit ha akon paghimo hin istorya para dinhi hin nga at’ website nga siring pa niya mauy-og han kahoy para magkahudlog an mga amo… ngan magkagawas para mag-istorya han kamatuuran…kun hin-o in hira…di la ak hin saba.

Ikatulo, kan Miguel Cruz, usa nga magturutdo, nga amo an nagtutdo ha akon kun natipaunan-o an maupay nga pamaagi pagpahamtang hini nga istorya. Siring niya, igpahamtang hin usa nga paagi nga diri ka mapili hin uugupan…kun baga ha English, THINKING OUT OF THE BOX…kuno. Ini nga sagdon akon gin-aro kay ginsagdunan man ako nga diri maglaba hin maghugaw nga panapton ha kadam-an. Salit mag-iistorya na la ako…

Ikaupat, para han ak manghod nga hi Pordakikay, nga para tutdo ha ak han mga tarutalagudti nga mga yinaknan nga waray ko na mahihinumdumi.

Ikalima, para han usa nga tawo nga nagdurot ha ak hin duro nga kahangit ug kasina, rason kun kay ano ginganahan ak pagsinurat bisan katutnga na hin gabi…

Ngan labaw han ngatanan para han Diyos nga Makagarahom han iya ginhatag ha akon nga hibaro ngan kaabtik hin panhunahuna para makagsurat ako hin mga butang nga kinahanglan ipahamtang ngan kahibaruan han ngatanan…

———————-

PANTASTIK POR MEETS THE EAST WING: Aragway ha FAR, FAR, AWAY Kingdom
By: PROKOPYA, an uyab ni PROKOPYO

Han umulpot an ak Bukatkat ngadto hini nga ginhadian para manginano han mga bag-o nga panhinabo ha Far Far Away Kingdom, nakasagap ini hin maupay nga sumat han nasasakupan han Hadi, tungod hin pagkaada hin bag-o nga lugar kun diin bisan adto ka ha harayo naukoy, makakabaro ka la gihapon han mga istorya ug natatabo hini nga ginhadian agi hini nga gintatawag moderno nga pamaagi kun diin tanan nga mga sakop, an hadto ngan han yana, puyde maghimangraw gamit an Internet, pinaagi hin nga Website. Dagos la ginhuring hini nga akon Bukatkat an iya mga nasagap nga mga himangraw, rason nga gumawas ini nga aton susumaton.

Mag-aabre an aton istorya hin usa nga panhitabo nga naglabay na. Ini nga ginhadian amo in ginpadalagan hin mga magbaysay nga mga kababayin-an. Tanan in hira, naningkamot para magin maribhong ug mauswag ini nga ginhadian. Umulpot an panahon nga natapos an paghadi hini nga mga kababayin-an. Nagkaada hin mahugot nga himangraw kun hin-o an pipilion nga mabalyo han nakapot han renda hini nga ginhadian. Mayda mga panhinabo nga nag-uy-og hini nga ginhadian nga pati ngani an sakop hini nga adto na ha hirayo nanhibaro hini nga pagkaburubingkil.

Usa han makusog nga kandidato para han pagpipilian hini nga pagkahadi amo an The Poet ngan han Hadi yana hini nga ginhadian, nga amo an The Pied Piper. Han harapit na matima an piniliay, amo gud ini hira an baga gumawas nga mahugot nga magkontra. Ini nga The Pied Piper amo in usa nga Maestro ha kaluyo nga katunaan kun diin adto ginhihimo an mag-upay nga mga estudyante hin paghipos ngan pag-ihap hin kwarta ngan mga estudyante hin pagpadalagan hin negosyo.

Ha luyo nga panig, an The Poet amo in magturutdo gihap hin mga bata nga gusto magin magsusurat ngan magin makarit nga tagapagyakan.

Han nagpiniliay na, hira nga duha an mahugot nga nagpanta. Pero an The Poet waray man baga buynasa tungod nga siring han mga tagapaserbe han palasyo nga ha panahon nga lumingkod ini nga The Poet “damo an makaliding mga ulo!” kumbaga, “heads will roll!” Siring pa nira, damo an mawawarayan iparalit hin bugas ngan sura kay damo nga mga tagapagserbe han palasyo an posible malaknit ha ira mga mag-upay nga puwesto. Intonses, damo an nadiri hini nga The Poet, ini tungod nga baga ini nga The Poet duro liwat hin kaistrikto, bisan an iya paghiyom pinapalit, waray hiya mahibaro han tinatawag nga pakigsarusarangkay ngan pakigplinastikay para la hin politika para la han iya baga pagin sikat nga amo unta an madara han iya kadaugan.

Hapagkahalipot nga istorya, nagdaug an The Pied Piper. Yana, hiya na an Hadi han hini nga ginhadian nga aton tatawagon nga Far, Far Away Kingdom. Ngan nagtikang hiya pagpadalagan han iya ginsasakupan. Maupay na unta inin iya baga marumando, sugu-sugo ngan turututdo han iya mga sakop, lugaring kay mayda upat nga mga gingahuman nga mga FAIRIES, nga gintawag nga PANTASTIK POR nga yana usa nga dako hinduro nga puwersa nga nakigbalungingi hini nga hadi.

Ada iton mga panhinabo nga diri nasugot ini nga mga Fairies hinin aton Hadi. Ngan baga kun nagkikirigta waray gud baga napapirdi hin magraot nga siniplatay. Kun ano an mga ginmamando han hadi, mayda manta makusog nga pagdiri ug pag-ato nga matikang hini nga Pantastik Por… ada an pabarubalyo hin magraot nga mga yakan, pabarubalyo hin magharang nga mga surat, ngan han waray katapusan nga paluru-limparo ha ira mga mata ha oras hin pagkirigta.

Ini nga Pantastik Por amo in gin-aapihan hin The Collector, The Painter, The Writer ngan han napirdi nga The Poet. Ini hira nga upat amo an baga naukupar han partido nga tinatawag nga makaWALA, kay TUO man an kinamumutangan hini nga Hadi ngan han iya mga alipores. Amo ini an tinikangan han WEST ngan EAST WING.

Ha aton pagpapadayon ha aton istorya, an mga ugop han hadi, ada han tinatawag nga East Wing an ugop han mga Pantastik Por, ada han West Wing. Ngan kita-kita han akon Bukatkat nga baga baga ini hira hin lana ngan tubig nga diri puyde magtampo kay bangin magpunite ngan magkamrasay.

An mga taga-Pantastik Por adto an headquarters ha harayo nga dapit han gihadian kun diin an dati nga palasyo han hadi nakabutang. An mga ugop han Hadi, adi yana nakabutang han bag-o nga lugar nga gintindog para han mga malingkod ha renda han pamunuan. Bisan an ira mga kampo, diri puyde nga magkaupod tungod nga bangin mag-agway. Ha pagmatuod hini bisan an lugar para han mga magturutdo hini nga Far Far Away Kingdom amo in ginbutangan hin barikada, and gintatawag ha English nga “cubicle” nga higtaas an mga bungbong para bisan an mga magturutdo nga ada han magkaluyo nga partido diri makagsiplatay, kay pati an siplat, magpipirintsingay!

Ini nga mga magkakontra partido, mayda in hira baga mga alegasyon nga ginpapalupad ngan ginwiwirik ha hangin, yawat na la baga umulpot ngadto han ira tagsa-tagsa nga talinga, ha paglaum nga ini nga pabati-bati magdudurot hin samad ha kada kampo, siring pa han akon Bukatkat.

Pira han mga natirok hini nga akon taga-istorya nga himangraw tikang han kampo han Pantastik Por amo an mga masunod nga alegasyon:

Una, mayda usa nga babayi nga tatawagon ta nga The Scribe, nga tagaserbe han Hadi nga nakapot han renda han pamunuan nga nagmamando han mga hihimuon han upat nga Fairies, an Pantastik Por ha ira mga tagsa-tagsa nga sakop ha ginhadian, nga nagpakita hin kawaray kuno pagtagad ngan pagrespeto han kaiha na hini nga mga Fairies dinhi hini nga ginhadian. Baga napanting an talinga han The Painter kay baga nawawarayan man kuno ini nga The Scribe batasan kay iba na an iya pagtagad hini nga The Painter. Waray naman daw la hini igrespeto an kalagas han The Painter hiton pagmando hini han paghatag hin oras nga panahon han pagsulod han trabaho han The Painter. Salit bale bulos, waray magpakita ha iya trabaho an The Painter, sige an pamiling han iya mga sakop nga nahulat han iya trabaho ngan pagsulod, pero waray gud sulod an The Painter hasta nga diri nahugdon ha iya hitaas nga paglupad an The Scribe ngan makig-istorya han Painter ha tono nga baga maayon an nasabi nga Fairy.

Ikaduha, ini na liwat nga The Scribe namiling hin iba nga maliwan han lugar han usa nga tagaserbe nga tatawagon ta nga The Dancer, tungod kay nagproblema an papeles han The Dancer. Waray daw parupanginano nga basta na daw nagbiling hin bag-o nga tagasayaw an The Scribe ngan waray naman la panginano nga sige na an sulod ha trabaho han The Dancer. An problema la liwat kay sige na an sulod han Dancer han iya trabaho tapos tigda la nga papaundangon kay liliwanan liwat kuno hin iba. An natabo, umugop an usa nga Fairy han Pantastik Por nga an The Collector han The Dancer, nagpasurat surat hira han The Scribe hasta nga naklaro nga an The Dancer na gud an may katungod hini nga trabaho.

Ikatulo, sumat han sangkay hinin akon Bukatkat nga nagkita an duha nga miyembro han magkakontra partido ha usa nga kasal! Ngan maluoy an Diyos, waray gud kuno ini hira magtagaray. Waray gud hira baga magsiplatay. Baga kuno hin nanlalahos an ira mga kita ha tagsa-tagsa. Baga waray liwat makabantay ug makaabat an duha nga ginkasal hini nga mapaso nga natabo han ira kasal tungod diri man hira naruruyag nga baga tumimpo hin sugad hini nga delito kay ada man la hira han butnga nga parte hini nga aragway kay usa han kinasal amo in nalingkod nga puno han mga tagaserbe han ginhadian.

Ngan ikaupat, gin-aalegar han Pantastik Por nga waray gud kalugaringon nga gintitindugan nga desisyon ug aksyon an Hadi tungod nga an renda daw han pamunuan han dinhadian amo in ginkakaptan hin tulo nga mga kababayin-an, an The Crying Ladies, hira an The Gatherer, The Lecturer and The Botanist. Duha hini nga The Crying Ladies amo in mga dati na nga naghadi hini nga ginhadian, hira an akon ginsisiring ko han pagtikang nga mga magbaysay nga mga kababayin-an. Siring pa han istorya, hamay ka ba liwat kuno it, ginbuhat han The Lecturer nga iya kuno ginbusaan an Hadi ha butnga hin usa nga pormal nga kirita ug himangraw, ha atubangan mismo han mga tawo nga nagkakapot han renda han pamunuan. Siring pa han The Collector han Pantastik Por, diri ini maupay nga ginbuhat han The Lecturer kay diri naman kuno hiya pa an hadi, tapos na an iya termino, kun makakiwa hiya ngan manyakan baga baga hiya hin hiya pa an hadi. Kairo naman daw la hini nga Hadi nga baga waray bukog nga ginsusupa hini nga iya mga The Crying Ladies.Han una baga di pa gud baga natuod ini nga akon Bukatkat hini nga mga alegasyon, pero may natabo.

Han adlaw nga gintakna para han marisyo nga pagsaurog han kaadlawan han ginhadian kun diin magkatitirok adton mga ginsakupan nga nagkalakat na hini nga ginhadian, nakit-an gud niya nga ungod ngay an ini nga mga nanabo!

Ada kay, klaro nga diri magsangkay an taga-East Wing and West Wing, bisan han kuhaay hin retrato kun puyde la diri magsapit an duha nga grupo. Pati an panawag han maghahatag hin pahalipay ha mga tumambong nga mga bisita, nakikit-an nga an mga taga-Pantastik Por amo in na-iitsa puwera.

Usa pa han marisyo nga natabo amo an panlingkod ha lugar nga ginbuhatan han katitirok, kay mga lingkuranan natunga ha duha nga pako, an adi ha tuo, an mga Hadi ngan han iya The Crying Ladies ngan alipores samtang an nakadi han wala amo liwat an kampo han Pantastik Por. Kun kilala ka nga tagasuporta han Pantastik Por ada ka malingkod ha ira dapit, samtang an mga tagaserbe han palasyo nga obligado pagsugot han Hadi amo in nalingkod ha iya dapit. Salit pa man, an akon Bukatkat, didto lumingkod ha sapit han mga waray salabutan nga mga kabataan nga parte han nasasakupan.

O gasi niyo, dida la tubtub ini nga akon istorya? Mayda pa dida han oras han pangaon, abaadaw nasiring an akon Bukatkat nga klaro gud an East Wing ngan West Wing…adton mga Pantastik Por nakadi hin usa nga lamesa ha kaluyo nga parte han bulwagan kun diin ginbuhat an pangaon samtang ha kaluyo nga parte amo liwat an kanan Hadi mga sakop. Natutunga an nasabi nga lugar hin halaba nga magkaluyo nga lamesa nga mayda pagkaon nga pareho an andam. Ha pagkita han akon Bukatkat, pati an pagkuha hin pagkaon baga diri liwat dapat magtampo an duha nga partido, adto hira han magkaluyo nga lamesa tagsa tagsa nga kumuha hin pagkaon. Salit pa man, pati ha pagkuha han mga retrato para handumanan hini nga pangaon ug katitirok klaro nga mayda mga tawo nga diri gud nagtatampo.

Ha pagkamatuod hini, duha an tawo nga gintagan hin gahom para manguha hini nga mga retrato. Tumuod ka o diri, kada kampo mayda para retrato, mayda kalugaringon letratista an Pantastik Por ngan han The East Wing.

San-o matima an aton istorya, mayda binayaan nga himangraw an akon Bukatkat, iya liwat tagdara hin magharang nga mga himangraw, an kamatuuran hini nga istorya ada na la makikit-an kun mayda na klaro nga panhinabo nga mabuto hini nga ginhadian…

Siring han kanan akon Bukatkat bubuyog, mayda kuno naplano nga pakighimangraw an Pantastik Por ngadto han mas hataas nga pamunuan nga nagsasakop hini nga ginhadian, amo ini hira an The Gods. Kun diin igrereklamo na daw nira an kawaray klaro nga kiwa ngan desisyon hini nga Hadi ngadto han The Gods para matagan ini hin iksakto nga sirot para hini nga Hadi. Mayda daw surat nga pinirmahan ini nga upat nga Fairies para hini nga ira ginrereklamo nga ginawian hini nga Hadi.

Kun ano an matatabo, ta barubantay la kita hin mga kadugangan nga katukiban, kay bangin bumalik pa an akon Bukatkat ha mga masunod nga adlaw ngadto ha Far Far Away Kingdom para magtirok utro hin mga istorya para hini nga iyo tagasurat. Hapagkayana, mayda kuno nakakabungol nga kamingaw nga natatabo hini nga ginhadian…baga senyales daw ini hin umarabot nga bagyo…

Kun ano ini… hulat na la han Part 2 hini nga aton susumaton.